உத்தரப்பிரதேசத்தில் கணவர் வேறொருவருடன் உறவில் இருப்பதாக சந்தேகமடைந்த மனைவி, தூங்கிக் கொண்டிருந்த கணவரின்மீது கொதிக்கும் வெந்நீரை ஊற்றி, உறவினர்கள் உதவியுடன் மாடியில் இருந்து தூக்கி வீசி கொலை முயற்சியில் ஈடுபட்ட அதிர்ச்சி சம்பவம், நடைபெற்றுள்ளது.
உத்தரப்பிரதேச மாநிலம், கோரக்பூரில் இருந்து சுமார் 50 கி.மீ தொலைவில் உள்ள பகுதி தியோரியா. இப்பகுதியைச் சேர்ந்த அம்ரிதா ராய் என்பவருக்கும், பாலியாவைச் சேர்ந்த ஆஷிஷ் குமார் ராய் என்பவருக்கும் திருமணம் நடைபெற்றுள்ளது.
இந்நிலையில், கணவருக்கு திருமணத்தை மீறிய தொடர்புகள் இருப்பதாக அம்ரிதா ராய் சந்தேகம் கொண்டு, தனது கணவருடன் தகராறில் ஈடுபட்டு வந்துள்ளார். மேலும், கணவருடன் கோபித்துக் கொண்டு தியோரியாவில் உள்ள தனது தாயாரின் வீட்டுக்கும் வந்துவிட்டார்.
கடந்த ஏப். 13-ம் தேதி, தனது மனைவியைப் பார்க்க தியோரியாவுக்கு வந்த ஆஷிஷ் குமார் ராயின் செல்போன் மற்றும் மோட்டார் சைக்கிள் சாவியை பறித்துக் கொண்ட மனைவியின் குடும்பத்தினர், அன்றிரவு மட்டும் அங்கேயே தங்கி விட்டுச் செல்லுமாறு வற்புறுத்தியுள்ளனர்.
வேறு வழியின்றி அதனை ஏற்றுக் கொண்ட ஆஷிஷ் குமார் ராய், இரவு தூங்கிக் கொண்டிருந்தபோது, நள்ளிரவு 3 மணியளவில், அந்த அறையில் உள்ள பாத்ரூமை பயன்படுத்திக் கொள்வதற்காக வருவதுபோல வந்த அவரது மனைவி, அவரது தங்கை ஏற்கெனவே கொதிக்க கொதிக்க தயார் செய்து வைத்திருந்த வெந்நீரை, தூங்கிக் கொண்டிருந்த கணவர்மீது ஊற்றினார்.
இதில், உடல் வெந்து, வலி தாங்காமல் தப்ப முயன்ற ஆஷிஷ் குமார் ராயை, மனைவியின் குடும்பத்தினர் ஒன்றுசேர்ந்து, கொடூரமாகத் தாக்கியுள்ளனர். இதில் அவரது உடல் மற்றும் தலையில் பலத்த காயங்கள் ஏற்பட்டுள்ளது. இறுதியில், ஆஷிஷ் குமார் ராயை, வீட்டின் மாடியில் இருந்து தூக்கி, வெளியே வீசி கொலைசெய்ய முயன்றுள்ளனர்.
இதில் பலத்த காயமடைந்த ஆஷிஷ் குமார் ராயை, அருகில் இருந்தோர் மீட்டு, மருத்துவமனையில் அனுமதித்தனர். சம்பவம் குறித்து, தகவல் அறிந்த போலீஸார், கணவர்மீது வெந்நீரை ஊற்றி, மாடியில் இருந்து தூக்கி வீசி கொலை முயற்சியில் ஈடுபட்ட அவரது மனைவியைக் கைதுசெய்து, விசாரணை மேற்கொண்டு வருகின்றனர்.
கணவரை மனைவியே வெந்நீரை ஊற்றி, அடித்து துன்புறுத்தி, மாடியில் இருந்து தூக்கி வீசி கொலைசெய்ய முயன்ற சம்பவம், அப்பகுதியில் அதிர்ச்சியை ஏற்படுத்தியுள்ளது.
from Vikatan Latest news https://ift.tt/KEs8yl6
0 Comments