மனதின் 'ஹாஃப் மூன்'... மாற்றத்தின் ஃபுல் மூன்! - இளம் எழுத்தாளர் இனியாவின் நெகிழ்ச்சிப் பயணம்

"

பிப்ரவரி 22, ஞாயிற்றுக்கிழமை.. கோவை ரேஸ் கோர்ஸ் பகுதியில் உள்ள 'ஆனந்தா'வில் அந்தி மாலைப் பொழுதில் நிலவிய ஒரு நெகிழ்ச்சியான இலக்கியச் சங்கம். 'டாக்டர் நெட் இந்தியா' (DoctorNet India) நிறுவனர்கள் மற்றும் இனியாவின் பெற்றோரின் வரவேற்புரையுடன் தொடங்கிய இந்த விழாவில், சுமார் 130-க்கும் மேற்பட்ட நண்பர்கள், உறவினர்கள், மருத்துவர்கள் மற்றும் உளவியலாளர்கள் என ஒரு பெரும் கூட்டமே திரண்டிருந்தது.

நிழலின் நிஜங்கள்!

பெங்களூருவில் கணிதப் பாடத்தில் இளங்கலை பயிலும் 20 வயது மாணவி இனியா, தனது கடினமான கல்லூரிப் படிப்பிற்கு இடையே, மாற்றுத்திறனாளி மனிதர்களின் வாழ்வியலை மையமாக வைத்து 'Half Moon' (ஹாஃப் மூன்) என்ற சிறுகதைத் தொகுப்பை உருவாக்கியுள்ளார். பத்தாம் வகுப்பு படிக்கும் போதே ஒரு பள்ளித் திட்டமாகத் தொடங்கிய இந்தப் பயணம், இன்று 80 பக்கங்கள் கொண்ட வலிமையான ஆவணமாக உருவெடுத்துள்ளது.

குள்ளத்தன்மை (Dwarfism), செவித்திறன் குறைபாடு, ஆட்டிசம், தசைச் சிதைவு நோய், செரிப்ரல் பால்சி, போலியோ, பார்வையின்மை, டிமென்ஷியா, ஆசிட் வீச்சால் பாதிக்கப்பட்டவர்கள் மற்றும் பைபோலார் டிஸ்ஆர்டர் எனப் பத்து விதமான சவால்களைச் சந்திக்கும் மனிதர்களின் நிஜ அனுபவங்களே இந்தப் புத்தகம். 'Her Stories' வெளியீட்டகத்தின் மூலம் வெளிவந்துள்ள இந்தப் புத்தகத்திற்கு டாக்டர் காயத்ரியின் தத்ரூபமான ஓவியங்கள் கூடுதல் உயிர் சேர்த்துள்ளன.

"தங்களுக்குப் பழக்கமே இல்லாத ஒருவரிடம், தங்கள் வாழ்நாள் வலிகளைப் பகிர்ந்துகொள்வது எளிதல்ல. இருப்பினும் அவர்கள் என் மீது வைத்த நம்பிக்கையே இந்தப் புத்தகத்தின் உயிர்நாடி," என்கிறார் இனியா பெருமிதத்துடன்.

வாசகிகளின் நெகிழ்ச்சிப் பகிர்வுகள்!

விழாவில் புத்தகத்தைப் படித்துவிட்டுப் பகிர்ந்துகொண்ட வாசகிகளின் உணர்வுகள் அரங்கத்தையே ஒரு நிமிடம் அமைதியில் ஆழ்த்தியது. வாசகிகளின் சில முக்கியமான பகிர்வுகள் இதோ:

"இதில் வரும் முதல் கதை, ஒரு பரந்த மனப்பான்மையுடன் உலகைப் பார்க்கக் கற்றுக்கொடுத்தது. குறிப்பாக திருமணம், வேலை மற்றும் பணம் குறித்த ஒரு பெண்ணின் பார்வையை இது முழுவதுமாக மாற்றுகிறது."

"ஒவ்வொரு கதையும் வெறும் கதையல்ல; அவை அந்த மனிதர்களின் வலியும் போராட்டமும் நிறைந்த அனுபவங்கள். இதைப் படித்து முடிக்கவே ஒரு தனி தைரியம் வேண்டும், ஏனெனில் ஒவ்வொரு பக்கமும் நம் மனதிற்குள் மிகப்பெரிய பாதிப்பை ஏற்படுத்துகிறது."

"ஒரே நாளில் படித்து முடித்துவிட்டேன். இது மாற்றுத்திறனாளிகளைப் பற்றிய கதை அல்ல; அவர்களுக்குள் இருக்கும் 'அபூர்வத் திறமைகளை' (Abilities) வெளிச்சம் போட்டுக் காட்டும் கதை" - என்றாள் 7-ம் வகுப்பு படிக்கும் ஒரு சுட்டி வாசகி.

"இந்தக் கதைகளில் இருக்கும் அமைதி என் கன்னத்தில் அறைவது போல இருந்தது. அத்தனை எளிமை, அத்தனை வலி! படித்த பிறகு ஒருவிதமான அமைதியையும் புத்துணர்வையும் உணர முடிந்தது."

வல்லுநர்களின் உரையாடல்

திருமதி திவ்யா அவர்கள் தொகுத்து வழங்கிய இந்நிகழ்வின் ஒரு முக்கியப் பகுதியாக, ஒரு சிறப்பான கலந்துரையாடல் நடைபெற்றது. இதில் டாக்டர் வேலாயுதம் மேனன், டாக்டர் நிதின் சீனிவாசன், டாக்டர் ஷில்பா டெரன்ஸ், சிறப்பு கல்வியாளர் ரமா மற்றும் பராமரிப்பாளர் (Caregiver) திருமதி தெய்வானை ஆகியோர் பங்கேற்றனர்.

சமூகத்தில் நிலவ வேண்டிய உணர்திறன் (Sensitivity) மற்றும் சக மனிதர் மீதான பச்சாதாபம் (Empathy) குறித்து இவர்கள் பகிர்ந்துகொண்ட கருத்துக்கள் பார்வையாளர்களிடையே பெரும் தாக்கத்தை ஏற்படுத்தின. குறிப்பாக, ஒரு பராமரிப்பாளராக திருமதி தெய்வானை அவர்கள் பேசுகையில், "அவர்கள் தங்களுக்குக் காட்டப்பட்ட பாதையில் நடக்கவில்லை; தங்களுக்குத் தாங்களே ஒரு பாதையை உருவாக்கி கம்பீரமாக நடக்கிறார்கள்," என்று கூறியபோது அரங்கமே நெகிழ்ந்தது.

பின்னணியில் 'டாக்டர் நெட்'!

இனியாவின் இந்தப் படைப்புக்கு மிக முக்கியத் தூண்டுகோலாக இருந்தது அவரது பெற்றோர் நடத்தும் 'DoctorNet India' தன்னார்வத் தொண்டு நிறுவனம். இதன் மூலம் கிராமப்புற மற்றும் பழங்குடியின மக்களுக்கு மருத்துவ உதவி கிடைப்பதை ஒரு பாலமாக இருந்து இனியாவின் குடும்பத்தினர் செயல்படுத்தி வருகின்றனர்.

இனியாவின் ஆங்கில வழிகாட்டி குறிப்பிட்டது போல, "ஒவ்வொரு கதாபாத்திரத்திலும் இருக்கும் ஒரு நிஜ மனிதனை தேடுவதுதான் இந்தத் தொகுப்பின் நோக்கம்." சவால்களைக் கண்டு முடங்கிப் போகாமல், ஒவ்வொரு தடையையும் ஒரு படிக்கட்டாக மாற்றும் மனிதர்களின் கதையே இந்த 'ஹாஃப் மூன்'.

கணிதப் பாடத்தின் கடினமான சூத்திரங்களுக்கு இடையே, சக மனிதர்களின் மன உணர்வுகளையும் அழகாகப் புரிந்துகொண்டு, அதை ஒரு படைப்பாக மாற்றிய இனியாவிற்கு அனைவரும் வாழ்த்துக்கள் கூறி விழாவை நிறைவு செய்தனர்.

- ஓவியா சா

- ராஜமுகேஷ் பா

from Vikatan Latest news https://ift.tt/pWnewXl