ராகு-கேது பெயர்ச்சி பலன்கள் 2022 துலாம் - கே.பி.வித்யாதரன்

வாழ்வில் உச்சத்தை எட்டிய பிறகும் பழைய நிலைமையை மறக்காத குணம் கொண்டவர் நீங்கள். நம்பி வந்தவர்களைக் கைவிடாமல் நேசக்கரம் நீட்டுபவர். கடலளவு அன்புகொண்ட நீங்கள், கொடுத்த வாக்கைக் காப்பாற்ற துடிப்புடன் செயல்படுவீர்கள். உங்களுக்கு 21.03.2022 முதல் 08.10.2023 வரையிலும் ராகுவும், கேதுவும் என்னென்ன பலன்களைத் தரப் போகிறார்கள் என்பதைப் பார்ப்போம்.

ராகுவின் பலன்கள்!

இதுவரை உங்கள் ராசிக்கு எட்டாம் வீட்டில் அமர்ந்து உங்களைப் படாத பாடு படுத்தியெடுத்த ராகு பகவான் இப்போது ராசிக்கு ஏழாம் வீட்டில் வந்து அமர்கிறார். ஆகவே பிரச்னைகள் நீங்கும். உங்களிடம் மறைந்து கிடக்கும் திறமைகளை வெளிக் கொண்டு வர ராகு அருள்புரிவார். வீண் விவாதங்கள், மன உளைச்சல், டென்ஷன், காரியத்தடைகள் அனைத்தும் நீங்கும். உற்சாகத்துடன் வலம் வருவீர்கள்.

குடும்பத்தினருடன் விட்டுக் கொடுத்து போவீர்கள். கணவன் - மனைவிக்குள் சந்தோஷம் நிலைக்கும். எனினும் அவ்வப்போது வாழ்க்கைத் துணைவருடன் சிற்சில விவாதங்கள் வரவே செய்யும். பெரிதுபடுத்தாதீர்கள். வாழ்க்கைத் துணைவர் தரும் அறிவுரைகளை மனமுவந்து ஏற்றுக் கொள்ளுங்கள். அவர்வழி உறவினர்களால் கருத்துமோதல், பகைமை வந்து போகும். எந்த விஷயமாக இருந்தாலும் மற்றவர்களின் ஆலோசனையின்றி சுயமாக சிந்தித்து முடிவெடுங்கள்.

வீட்டில் துள்ளி விளையாட ஒரு பிள்ளை இல்லையே என நெடுங்காலமாக வருந்தும் அன்பர்களுக்கு விரைவில் குழந்தை பாக்கியம் உண்டாகும். குலதெய்வத்திற்குச் செய்ய வேண்டிய நேர்த்திக்கடனைச் சிறப்பாக முடிப்பீர்கள். அரசாங்கக் காரியங்களில் தடுமாற்றங்கள் விலகும்.

கே.பி.வித்யாதரன்

ராகுபகவானின் நட்சத்திர சஞ்சாரம்:

21.03.2022 முதல் 22.05.2022 வரை: சூரியனின் கார்த்திகை நட்சத்திரம் 1-ம் பாதத்தில் ராகு செல்வதால் திடீர் செலவுகள், பூர்வீகச் சொத்துச் சிக்கல்கள் வந்துபோகும். யாரையும் நம்பி முக்கிய முடிவுகள் எடுக்காதீர்கள்.

23.05.2022 முதல் 29.01.2023 வரை: சுக்ரனின் பரணி நட்சத்திரத்தில் ராகு செல்வதால் பண வரவு திருப்திகரமாக இருக்கும். வீட்டில் தடைப்பட்டுக் கொண்டிருந்த சுபகாரியங்கள் கூடி வரும். பழைய வாகனத்தை மாற்றுவீர்கள்.

30.01.2023 முதல் 08.10.2023 வரை: கேதுவின் அஸ்வினி நட்சத்திரத்தில் ராகு செல்வதால் காரியத்தடைகள், வேலைச்சுமைகள் அதிகரிக்கும். விரக்தி, சோம்பல், மன உளைச்சல் வந்து போகும்.

வியாபாரத்தில்: போட்டியாளர்களைச் சமாளிக்க முடியாமல் திணறினீர்களே! இனி அவர்களுக்கு ஈடுகொடுக்கும் வகையில் உங்கள் அணுகுமுறையை மாற்றுவீர்கள். புதிய முதலீடுகளைப் பற்றி யோசிப்பீர்கள். கடையை விரிவு படுத்துவீர்கள். ஷேர், கமிஷன், அரிசி குடோன், கட்டட உதிரி பாகங்களால் ஆதாயம் அடைவீர்கள். வேலையாட்களிடம் தொழில் ரகசியங்களை வெளியிட வேண்டாம். பழைய பாக்கிகளை நாசூக்காகப் பேசி வசூலியுங்கள்.

உத்தியோகத்தில், உங்களைக் குறைசொல்லிக் கொண்டிருந்த உயரதிகாரி இனி நேசக்கரம் நீட்டுவார். பதவி உயர்வு உண்டு. சக ஊழியர்களின் சொந்த விஷயங்களில் மூக்கை நுழைக்காதீர்கள். கணினித் துறையினர்களுக்கு வேலைச்சுமை அதிகரிக்கும். கலைத்துறையினர் போட்டி, பொறாமைகளுக்கு நடுவில் வெற்றி பெறுவார்கள். உங்களின் படைப்புகளை அரசு கௌரவிக்கும்.

ராகு கேது பெயர்ச்சி பலன்கள் துலாம்

கேதுவின் பலன்கள்!

இதுவரை உங்கள் ராசிக்கு இரண்டாமிடத்தில் நின்றுகொண்டு உங்களை பக்குவமில்லாமல் பேசவைத்து, பல பிரச்னைகளில் சிக்கவைத்த கேது, இப்போது உங்கள் ராசிக்குள்ளேயே வந்து அமர்வதால், சூழலுக்கு ஏற்ப பேசவைப்பார். எப்போதும் ஒருவித தடுமாற்றத்திலேயே இருந்த நீங்கள் இனி தன்னம்பிக்கையுடன் காணப்படுவீர்கள்.

குடும்பத்தினருக்கும் உங்களுக்கும் ஒரு பெரிய இடைவெளியே இருந்ததே, இனி அவர்களுக்காக அதிக நேரம் ஒதுக்கி அவர்களின் இன்பதுன்பங்களைப் பகிர்ந்துகொள்வீர்கள். பிள்ளைகளின் வருங்காலத்தைப் பற்றிய கவலைகள் அவ்வப்போது வந்து போகும். மகளுக்காக வரன் தேடி அலைவீர்கள். மகனின் வேலை - படிப்பு விஷயத்திற்காக அதிகம் போராட வேண்டியது வரும். ராசிக்குள் கேது அமர்வதால் தலைச்சுற்றல், ஒற்றைத் தலைவலி, காய்ச்சல், தூக்கமின்மை, எதிலும் ஒருவித சலிப்பு, முன்கோபம் வந்து நீங்கும். வருமானம் அதிகரித்தாலும் சேமிக்க முடியாமல் கையிருப்பு கரையும். பழைய கடனை எப்படி அடைக்கப் போகிறோமோ என நினைத்து அச்சப்படுவீர்கள்.

சகோதரர்களிடம் வீண் விவாதங்கள் வேண்டாம்; கொஞ்சம் விட்டுக் கொடுத்துப் போகவும். திடீர்ப் பயணங்களுக்குக் குறையிருக்காது. நண்பர்களுடன் வீண் வாக்குவாதங்களைத் தவிருங்கள். வாகனத்தைக் கவனமாக இயக்குங்கள்.

கேதுபகவானின் நட்சத்திர சஞ்சாரம்:

21.03.2022 முதல் 24.09.2022 வரை: குருவின் விசாகம் நட்சத்திரத்தில் கேது செல்வதால் எதிர்பார்த்த இடத்தில் பணம் உதவி கிடைக்கும். அரசால் ஆதாயம் உண்டு. சொத்து வாங்குவீர்கள்.

25.09.2022 முதல் 04.06.2023 வரை: ராகுவின் சுவாதி நட்சத்திரத்தில் கேது செல்வதால் தந்தையாரின் உடல்நிலை பாதிக்கும்.

04.06.2023 முதல் 08.10.2023 வரை: செவ்வாயின் சித்திரை நட்சத்திரத்தில் கேது செல்வதால் மனைவி மற்றும் சகோதர வகையில் ஒத்துழைப்பு அதிகரிக்கும்.

வியாபாரத்தில் ஓரளவு லாபம் உண்டு. கூட்டுத் தொழிலில் பங்குதாரர்களிடம் காரசாரமான விவாதங்களைத் தவிர்ப்பது நல்லது. புது ஏஜென்ஸி எடுப்பீர்கள். அரசாங்கக் காரியங்களில் அலட்சியம் வேண்டாம். வரிகளை முறையாக செலுத்திவிடுவது நல்லது. உத்தியோகத்தில் வேலைச்சுமை அதிகரிக்கும். எனினும் மகிழ்ச்சிக்கு குறைவிருக்காது. மூத்த அதிகாரிகளின் ஆதரவு கிடைக்கும். சக ஊழியர்களிடையே வாக்குவாதங்கள் வந்து நீங்கும்.

from Latest News https://ift.tt/VtQmglT