ராகு-கேது பெயர்ச்சி பலன்கள் 2022: மிதுனம் - கே.பி.வித்யாதரன்

எறும்பைப் போல் சுறுசுறுப்பும், எதுகைமோனையான பேச்சும், சிந்தனையாற்றலும் கொண்டவர் நீங்கள். எதையும் தொலைநோக்குடன் செய்து முடிப்பவர்கள். எப்போதும் மற்றவர்களுக்குச் சவாலாக விளங்கும் நீங்கள், சில நேரங்களில் விட்டுக்கொடுத்துப் போவீர்கள்.உங்களுக்கு 21.03.2022 முதல் 08.10.2023 வரையிலும் ராகுவும் கேதுவும் என்னென்ன பலன்களைத் தரப்போகிறார்கள் எனப் பார்ப்போம்.

அதிரடி முன்னேற்றத்தைத் தருவார் ராகு!

இதுவரை உங்களின் ராசிக்கு பன்னிரண்டில் அமர்ந்து காரியத் தடைகள், மன உளைச்சலைக் கொடுத்துவந்தார் ராகுபகவான். இனி உங்கள் ராசிக்கு லாப வீட்டுக்கு வருவதால் புத்துணர்ச்சியும், புதிய முயற்சிகளில் வெற்றியையும் அதிரடி முன்னேற்றத்தையும் தருவார். கொடுத்த வாக்கைக் காப்பாற்றுவீர்கள். சவாலான காரியங்களையும் சாதாரணமாகச் செய்து முடிப்பீர்கள். பணப் பற்றாக்குறையால் அவதிப்பட்டீர்களே, இனி சேமிக்கும் அளவுக்குப் பணவரவு அதிகரிக்கும்.

குடும்பத்தில் எப்போதும் கலகம், கலாட்டா என்றுதானே இருந்தது. இனி அமைதி, சந்தோஷம் நிலைத்திருக்கும். இனி உங்கள் வார்த்தைக்கு முக்கியத்துவம் அளிப்பார்கள். எதிரும்புதிருமாக சண்டை போட்டுக்கொண்டிருந்த கணவன் - மனைவி உறவில் இனி அந்நியோன்யம் அதிகரிக்கும்.

வீண் செலவுகளைக் குறைத்து அவசிய செலவுகளை மட்டும் செய்வீர்கள். குழந்தை பாக்கியம் இல்லாமல் தவித்த தம்பதியருக்குக் குழந்தை வரம் உண்டாகும். கடனை நினைத்து கவலைப்பட்டுக் கொண்டிருந்த நிலை மாறும்; அதிக வட்டிக் கடனை அடைக்க வழி பிறக்கும்.

பிள்ளைகள் நல்ல வழியைத் தேர்வு செய்வார்கள்; உயர்கல்வியில் வெற்றி பெறுவர். உங்கள் மகனின் திறமையைக் கண்டறிந்து அவரை உற்சாகப்படுத்துவீர்கள். மகளுக்கு நல்ல இடத்தில் வரன் அமையும். ஊரே மெச்சும்படி திருமணத்தை நடத்துவீர்கள். குழந்தை வரத்துக்காக குலதெய்வத்திடம் வைத்திருந்த வேண்டுதல் பிரார்த்தனையை நிறைவேற்றி வருவீர்கள்.

கே.பி.வித்யாதரன்

ராகு பகவானின் நட்சத்திர சஞ்சாரம்!

சூரியனின் கார்த்திகை நட்சத்திரம் 1-ம் பாதத்தில்: 21.3.2022 முதல் 22.5.2022 முடிய ராகு பகவான் கார்த்த்கை 1-ம் பாதத்தில் செல்கிறார். இக்கால கட்டத்தில் புதிய முயற்சிகள் வெற்றியடையும். இளைய சகோதரர்கள் மூலம் உதவிகள் கிடைக்கும். சொத்துச் சிக்கல் தீரும். அரசாங்கக் காரியங்களில் அனுகூலமான நிலை காணப்படும்.

சுக்ரனின் பரணி நட்சத்திரத்தில்: 23.5.2022 முதல் 29.1.2023 முடிய ராகுபகவான் பரணியில் சஞ்சரிக்கிறார். ஆகவே திடீர் பணவரவு உண்டு. பழைய பிரச்சனைகளுக்குத் தீர்வு கிடைக்கும். உங்களைக் குறை கூறியவர்களும் இனி பாராட்டுவார்கள். கௌரவப் பதவிகள் தேடி வரும். வீடு, மனை மூலம் லாபம் உண்டாகும்.

கேதுவின் அசுவினி நட்சத்திரத்தில்: 30.1.2023 முதல் 8.10.2023 முடிய ராகுபகவான் அசுவினியில் செல்கிறார். இந்தக் காலக்கட்டத்தில் சற்று கவனம் தேவை; குடும்பத்தில் சிறு சிறு குழப்பங்கள் ஏற்படலாம். திடீர் செலவுகளால் கையிருப்பு கரையும்.

வியாபாரத்தில்: மறைமுகப் போட்டிகளைச் சமாளிக்க முடியாமல் தடுமாறினீர்களே... கூட இருந்தவர்களே குழிபறிக்கும் நிலைக்கு ஆளானீர்களே... இந்த அவலநிலைகள் மாறும். போட்டியாளர்களுக்கு ஈடுகொடுக்கும் அளவிற்குப் புது யுக்திகளைக் கையாளுவீர்கள். கடையை விரிவுபடுத்துவீர்கள். பழைய சரக்குகள் விற்றுத்தீரும். புது ஏஜென்ஸி எடுப்பீர்கள். அனுபவம் மிகுந்த நல்ல வேலையாட்கள் வருவார்கள். கூட்டுத்தொழிலில் விலகிச் சென்ற பங்குதாரர்கள் மீண்டும் வந்து சேருவார்கள்.

உத்தியோகத்தில் அதிகாரிகளுடன் இருந்த மோதல் போக்கு விலகும். வெகுநாட்களாக எதிர்பார்த்த சம்பள உயர்வு இப்போது கிடைக்கும்.உங்களின் திறமைகள் வெளிப்படும். கணினித் துறையினருக்கு வேலைச்சுமை குறையும். அதிக சம்பளத்துடன் கூடிய புது வேலை கிடைக்கும். கலைத்துறையினருக்கு வேற்று மொழி வாய்ப்புகள் தேடி வரும்.

சொந்த வீடு கனவை நனவாக்கப் போகும் கேது!

இதுவரை உங்களின் ராசிக்கு ஆறாம் வீட்டில் அமர்ந்து ஓரளவு பண வரவையும், வி.ஐ.பிகளின் நட்பையும், கொஞ்சம் அலைச்சல் மற்றும் டென்ஷனைக் கொடுத்து வந்த கேது பகவான், இப்போது உங்கள் ராசிக்குப் பூர்வபுண்ணிய வீடான ஐந்தாம் வீட்டிற்கு வந்து அமர்கிறார். பிள்ளைகளால் உறவினர்கள், நண்பர்கள் மத்தியில் உங்கள் புகழ் கூடும். அதேநேரம் பிள்ளைகள் மூலம் அலைச்சலும் செலவும் உண்டாகும். எதிர்பார்த்த வகையில் உதவிகள் கிடைக்கும். ஆனால் தாய்வழி உறவினர்களுடன் மோதல் வரும்.

கர்ப்பிணிப் பெண்கள் மருத்துவரின் ஆலோசனைப்படி உணவு உட்கொள்வது நல்லது. தொலைதூரப் பயணங்கள் வேண்டாமே. சொந்தமாக ஒரு வீடு கட்ட வேண்டும் என்ற உங்களின் கனவு நனவாகும். சேமிப்பின் உதவியோடு சொந்த வீடு வாங்குவீர்கள்.

ஆன்மிகத்தில் நாட்டம் அதிகரிக்கும். வீண் வதந்திகளிலிருந்து விடுபடுவீர்கள். ஆனாலும் உள்மனசில் ஒருவித தயக்கமும், தடுமாற்றமும், சந்தேகமும் வந்து நீங்கும். மாணவ மாணவியர்களுக்கு மந்தம், மறதி விலகும். அதேநேரம், அவர்கள் படிப்பில் கவனம் செலுத்தவேண்டும்.

ராகு கேது பெயர்ச்சி பலன்கள் மிதுனம்

கேதுபகவானின் நட்சத்திர சஞ்சாரம்:

குருவின் விசாகம் நட்சத்திரத்தில்: 21.03.2022 முதல் 24.09.2022 முடிய கேது விசாகத்தில் செல்கிறார். மனைவியுடன் கருத்துமோதல், வீண் சந்தேகம், வீடு - வாகனப் பராமரிப்புச் செலவுகள் வந்துபோகும்.

ராகுவின் சுவாதி நட்சத்திரத்தில்: 25.9.2022 முதல் 04.06.2023 முடிய கேது சுவாதியில் சஞ்சரிக்கிறார். மற்றவர்களின் பிரச்னைகளைத் தீர்ப்பதாக நினைத்து வம்பில் சிக்கிக்கொள்ளாதீர்கள்.

செவ்வாயின் சித்திரை நட்சத்திரத்தில்: 04.06.2023 முதல் 08.10.2023 முடிய கேது சித்திரையில் சஞ்சரிக்கிறார். பழைய கடனை நினைத்து அச்சப்படுவீர்கள். சகோதரர்களிடம் விட்டுக்கொடுத்து போங்கள்.

வியாபாரத்தில்: பற்று-வரவு உயரும். வேலையாட்களின் தேவை அறிந்து உதவுவீர்கள். தொழில் ரீதியாக பிரபலங்களின் நட்பு கிட்டும். கூட்டுத்தொழிலில் பங்குதாரர்கள் உங்களின் வார்த் தையை, ஆலோசனையை ஏற்பார்கள். புரோக்கரேஜ், கெமிக்கல், ஏற்றுமதி - இறக்குமதி வகைகளால் ஆதாயம் உண்டு.

உத்தியோகத்தில் வெகு நாட்களாக எதிர்பார்த்த பதவி உயர்வு, சம்பள உயர்வு எல்லாம் இனி உங்கள் சீட்டைத் தேடி வரும்.

from Latest News https://ift.tt/qBb3Dxe