2022 ராகு-கேது பெயர்ச்சி பலன்கள் மேஷம் - கே.பி.வித்யாதரன்

புதுமையாக சிந்திக்கும் மனமும் பூப்போல புன்னகை பூக்கும் முகபாவமும், எடுத்த காரியத்தை எப்படியாவது முடித்துவிடும் அபார சக்தியும் கொண்டவர் நீங்கள். உங்களுக்கு 21.3.2022 முதல் 8.10.2023 வரை உள்ள காலகட்டங்களில் ராகுவும், கேதுவும் இணைந்து எப்படிப்பட்ட பலன்களை தரப்போகிறார் என்பதை பார்ப்போம்.

மனப்போராட்டத்தைப் போக்குவார் ராகு!

இதுவரை உங்கள் ராசிக்கு இரண்டாவது வீட்டில் உட்கார்ந்து கொண்டு மனப்போராட்டங்களை, வீண் அலைச்சலையும், காரியத் தடைகளையும் கொடுத்து வந்தார் ராகுபகவான். இனி அந்த நிலை மாறும். அவர் இப்போது உங்கள் ராசிக்குள்ளேயே வந்து அமர்வதால், படபடப்பான உங்கள் பேச்சில் இனி முதிர்ச்சி தெரியும். உங்களை சிலர் அவமதித்துப் பேசினாலும் தக்க பதிலடி தருவீர்கள்.

குடும்பத்தில் அவ்வப்போது வாக்குவாதங்கள் வந்தாலும் ஒற்றுமை பாதிக்காது. பிள்ளைகளின் உடல்நிலை சீராகும். அவர்களின் வருங்காலத்தை மனதில் கொண்டு முக்கிய முடிவுகள் எடுப்பீர்கள். அவர்களுக்குப் படிப்பின் மீது இருந்த அலட்சியம் மாறும். இருந்தாலும் பிள்ளைகளின் நட்பு வட்டத்தைக் கண்காணியுங்கள். உங்களின் விருப்பத்திற்காக, அவர்கள் விரும்பாத பாடத்தில் சேரும்படி வற்புறுத் தாதீர்கள். மகளுக்காக பல இடங்களில் வரன் பார்த்தும் ஒன்றுமே அமையவில்லையே என்று வருந்திக் கொண்டிருந்தீர்களே, இனி நல்ல இடத்தில் வரன் அமையும். கல்யாணத்தை உறவினர்கள், நண்பர்கள் மெச்சும்படி நடத்துவீர்கள்.

பணவரவு அதிகரிக்கும். என்றாலும் சேமிக்க முடியாதபடி செலவினங்களும் துரத்தும். சிலருக்குத் தலைச் சுற்றல், முன்கோபம் அதிகரிக்கும். உணர்ச்சி வேகத்தில் தவறான முடிவுகள் எடுக்க வேண்டாம். அவ்வப்போது மன உளைச்சல், டென்ஷன், சோர்வு, தலைவலி, வீண் சந்தேகம் வந்து நீங்கும்.

கே.பி.வித்யாதரன்

ராகு பகவானின் நட்சத்திர சஞ்சாரம்!

21.3.2022 முதல் 22.5.2022 வரை: சூரியனின் கார்த்திகை நட்சத்திரம் 1-ம் பாதத்தில் ராகு செல்வதால், இக்கால கட்டத்தில் வீட்டில் நல்லது நடக்கும். பிள்ளைகளால் சமூக அந்தஸ்து உயரும். அவர்களின் கல்வி, வேலை, திருமண முயற்சிகள் வெற்றியடையும். அயல்நாடு செல்லும் வாய்ப்பும் உண்டாகும்.

23.5.2022 முதல் 29.1.2023 வரை: சுக்ரனின் பரணி நட்சத்திரத்தில் ராகு செல்வதால் மனைவிவழி உறவினர்களிடம் இருந்த மனஸ்தாபங்கள் நீங்கும். விலகிச் சென்ற சொந்தம்பந்தங்களும் இனி தேடி வருவார்கள். நெடுநாள் கனவான வீடு, வாகனம் வாங்கும் திட்டம் நிறைவேறும்.

30.1.2023 முதல் 8.10.2023 வரை: கேதுவின் அசுவினி நட்சத்திரத்தில் செல்கிறார். இக்காலகட்டத்தில் உடல்நலக் குறைகள், சிறு சிறு விபத்துகள், ஏமாற்றங்கள், இழப்புகள் மற்றும் உறவினர்கள் மத்தியில் மனக்கசப்புகள் வந்து நீங்கும்.

வியாபாரத்தில்: வியாபாரத்தில் மற்றவர்கள் சொல்கிறார்கள் என நம்பி பெரிய முதலீடுகளைப் போட்டு நட்டப்படாதீர்கள். இருப்பதை வைத்து லாபம் சம்பாதிக்கப் பாருங்கள். போட்டியாளர்களின் எண்ணிக்கை அதிகரிக்கும். பழைய பாக்கிகளை கனிவாகப் பேசி வசூலியுங்கள். வேலையாட்கள் அடிக்கடி விடுப்பில் சென்று உங்களை டென்ஷாக்குவார்கள். முக்கிய வேலைகளை நீங்களே முன்னின்று முடிப்பது நல்லது. கூட்டுத்தொழிலில் பங்குதாரர்களை விட்டுப்பிடிக்கப்பாருங்கள். புது ஆர்டர்கள், ஏஜென்சிகளைப் போராடி பெறுவீர்கள். அரசுக்கு செலுத்த வேண்டிய வரிகளை அலட்சியமாக இருக்காமல் முறையே செலுத்தி விடுவது நல்லது.

உத்தியோகத்தில்: உங்களின் கடின உழைப்புக்கு ஒரு அங்கீகாரம்கூட கிடைக்கவில்லையே என்று வருந்தினீர்களே, இனி உங்களின் திறமையை அனைவரும் உணர்வார்கள். தடைபட்ட உரிமைகளும், சலுகைகளும் உடனே கிடைக்கும். மூத்த அதிகாரிகளின் வீட்டு விசேஷங்களில் கலந்து கொள்ளுமளவிற்கு நெருக்கமாவீர்கள்.

கணினித் துறையினருக்குப் புதிய வாய்ப்புகள் தேடி வரும். கலைத் துறையினருக்குப் பரிசு, பாரட்டுகள் குவியும். சம்பள விஷயத்தில் கறாராக இருங்கள்.

ராகு - கேது பெயர்ச்சி - மேஷம்

எதிர்ப்புகளைச் சிதறடிப்பார் கேது!

இதுவரை உங்கள் ராசிக்கு எட்டில் உட்கார்ந்து கொண்டு நிம்மதி இல்லாமலும், சரியான தூக்கமில்லாமலும் துரத்தியடித்த கேதுபகவான் இப்போது ராசிக்கு ஏழாவது வீட்டில் அடியெடுத்து வைப்பதால், உங்கள் ஆழ்மனதில் இருந்த பயம் விலகும். எதிர்ப்புகள் அடங்கும். குறைக் கூறியவர்கள் புகழ்ந்து பேசுவார்கள்.

உங்களிடம் மறைந்து கிடந்த திறமைகள் வெளிப்படும். பிரபலங் களின் அறிமுகமும் கிடைக்கும். பிள்ளைகளின் வருங்கால நலனுக்காக முக்கிய திட்டங்களை தீட்டுவீர்கள். உடன்பிறந்தவர்கள் ஒத்துழைப்பார்கள். சகோதரியின் திருமணத்தை கோலாகலமாக நடத்துவீர்கள். ஆனாலும் 7-ம் வீட்டில் கேது அமர்வதால் கணவன்-மனைவிக்குள் அவ்வப்போது காரசாரமான விவாதங்கள் வந்துபோகும். ஒருவருக்கொருவர் சந்தேகப்படுவதை தவிர்க்கவும். அந்தரங்க விஷயங்களை யாரிடமும் பகிர்ந்து கொள்ள வேண்டாம். வாழ்க்கைத் துணைவருக்கு லேசாக முதுகுவலி வந்து நீங்கும். சொத்துப் பிரச்சனை, பங்காளிச் சண்டைக்காக நீதிமன்றம் செல்ல வேண்டாம்.

கேதுபகவானின் நட்சத்திர சஞ்சாரம்!

குருவின் விசாகம் நட்சத்திரத்தில்: 21.03.2022 முதல் 24.09.2022 வரை கேதுபகவான் விசாகத்தில் செல்வதால் எதிர்பார்த்த வகையில் பண உதவியுண்டு. வீட்டில் மங்கள இசை முழங்கும். பிள்ளையில்லாமல் தவித்துக் கொண்டிருந்த தம்பதியருக்குக் குழந்தைப் பாக்கியம் கிட்டும். பெரிய பதவிகள் தேடி வரும்.

ராகுவின் சுவாதி நட்சத்திரத்தில்: 25.09.2022 முதல் 04.06.2023 வரை கேதுபகவான் சுவாதியில் செல்வதால் வீண் அலைச்சல், காரியத் தடைகள், ஏமாற்றம் வந்து போகும். பூர்வீகச் சொத்துப் பிரச்னைகளை நிதானமாகக் கையாளுங்கள்.

செவ்வாயின் சித்திரை நட்சத்திரத்தில்: 4.6.2023 முதல் 8.10.2023 வரை கேதுபகவான் சித்திரையில் செல்வதால் வி.ஐ.பிகளின் அறிமுகம் கிடைக்கும். பழைய நண்பர்கள் தேடி வருவார்கள். தாழ்வு மனப்பான்மையிலிருந்து விடுபடுவீர்கள். வாகனம் வாங்குவீர்கள்.

வியாபாரத்தில்: 7-ம் வீட்டில் கேது அமர்வதால் வியாபாரத்தில் போட்ட முதலை எடுப்பதற்கே பல போராட்டங்களைச் சந்திக்க வேண்டி வரும். பங்குதாரர்களுடன் கருத்துமோதல்கள் வெடிக்கும். வாடிக்கையாளர்களிடம் கனிவாகப் பேசுங்கள். வேலையாட்களிடம் தொழில் ரகசியங்களை வெளியிடவேண்டாம்.

உத்தியோகத்தில் பதவியுயரும். மேலதிகாரியை பகைக்கவேண்டாம். உயரதிகாரிகள் வற்புறுத்தினாலும், நீங்கள் நேர்பாதையில் செல்வது நல்லது. வேலைச்சுமை அதிகரிக்கும்.

from Latest News https://ift.tt/WlTMBOb