ராகு-கேது பெயர்ச்சி பலன்கள் 2022: விருச்சிகம் - கே.பி.வித்யாதரன்

குழந்தைகள் முதல் பெரியவர்கள் வரை அனைவருக்கும் சமமான மரியாதையைத் தரக்கூடிய நீங்கள், ஆழமாக யோசித்து அதிரடியாகச் செயல்படுபவர். உங்களுக்கு 21.03.2022 முதல் 08.10.2023 வரையிலும் ராகுவும் கேதுவும் என்ன பலன்களைத் தரப் போகிறார்கள் எனப் பார்ப்போம்.

ராகுவின் பலன்கள்!

இதுவரையிலும் உங்கள் ராசிக்கு ஏழாவது வீட்டில் நின்று கொண்டு எதிலும் உங்களுக்கு ஈடுபாடு ஏற்படாதவாறு முடக்கிவைத்திருந்தார் ராகு. தாழ்வு மனப்பான்மையையும், மன உளைச்சலையும், வீண் கவலைகளையும் தந்துகொண்டிருந்தார். இப்போது அவர் ராசிக்கு ஆறாமிடத்தில் வந்து அமர்கிறார். ஆகவே, எதிலும் முன்னேற வைப்பார். சந்தேகத்தால் பிரிந்திருந்த கணவன்-மனைவி ஒன்றுசேர்வார்கள். குடும்பத்தில் எப்போது பார்த்தாலும் சண்டை சச்சரவுகள்தானே மிஞ்சியது? கவலை வேண்டாம். இனி குடும்பத்தில் சந்தோஷம் பிறக்கும். மனைவி பிள்ளைகளுடன் மனம் விட்டுப் பேசுவீர்கள்.

வாழ்க்கைத் துணைவர் அடிக்கடி உடல்நலக்குறையால் அவதிப்பட்டாரே, இனி அவரின் ஆரோக்கியம் கூடும். எதிர்பார்த்த இடத்திலிருந்து உதவி கிடைக்கும். வரவேண்டிய பணம் எல்லாம் வந்து சேரும். கடன் பிரச்னைகளில் ஒரு பகுதியைத் தீர்ப்பீர்கள்.

பழைய நகைகளை மாற்றிவிட்டு புதிய டிசைனில் ஆபரணங்களை வாங்குவீர்கள். தந்தைவழிச் சொந்தங்களிடேயே மனஸ்தாபங்கள் வெடித்ததே! அந்த நிலை இனி மாறும். வெளிவட்டாரத் தொடர்புகள் அதிகரிக்கும். உறவினர்களுடனான மனவருத்தங்கள் நீங்கும். உங்களைப் பற்றித் தவறாக நினைத்தவர்களின் மனசு மாறும். வழக்கில் வெற்றி பெறுவீர்கள்.

கே.பி.வித்யாதரன்

ராகுபகவானின் நட்சத்திர சஞ்சாரம்:

21.03.2022 முதல் 22.05.2022 வரை: சூரியனின் கார்த்திகை நட்சத்திரம் 1-ம் பாதத்தில் ராகு செல்வதால், பிரபலங்களின் ஆதரவு கிடைக்கும். அவர்களின் துணையைப் பயன்படுத்திக்கொள்வீர்கள். வேலைச்சுமை அதிகரிக்கும். எதிர்பார்த்தபடி வங்கிக் கடனுதவி கிடைக்கும்.

23.05.2022 முதல் 29.01.2023 வரை: சுக்ரனின் பரணி நட்சத்திரத்தில் ராகு செல்வதால் பணப் பற்றாக்குறை நீங்கும். வீடு, வாகனம் வாங்குவீர்கள். வாழ்க்கைத் துணைவரின் ஒத்துழைப்பு அதிகரிக்கும். அவரின் உடல்நிலை சீராகும். வழக்குகள் சாதகமாகும். அரசாங்கக் காரியங்களில் வெற்றியுண்டு.

30.01.2023 முதல் 08.10.2023 வரை: கேதுவின் அஸ்வினி நட்சத்திரத்தில் ராகு செல்வதால் வீண் டென்ஷன், ஏமாற்றம், சிறுசிறு அவமானங்கள், வாகன விபத்துகள் வந்துபோகும். யாரையும் விமர்சித்துப் பேசாதீர்கள்.

வியாபாரத்தில் மற்றவர்களின் ஆலோசனையால் இழந்தது கொஞ்சம் நஞ்சமில்லை. இனி பழைய தவறுகள் நிகழாத வண்ணம் பார்த்துக் கொள்வீர்கள். விளம்பர யுக்திகளால் லாபத்தைப் பெருக்குவீர்கள். வாடிக்கையாளர்களின் எண்ணிக்கை அதிகரிக்கும். மருந்து வகை, எண்ணெய் வித்துக்கள், ஏற்றுமதி - இறக்குமதி வகைகளால் ஆதாயம் அடைவீர்கள். புதிய ஒப்பந்தங்களில் கையெழுத்திடுவீர்கள்.

உத்தியோகத்தில் தொந்தரவு கொடுத்து வந்த மேலதிகாரி இனி கனிவாகப் பேசுவார். சக ஊழியர்களும் உங்களிடம் நட்புறவாடுவார்கள். இழந்த சலுகையை மீண்டும் பெறுவீர்கள். கணினித் துறையினருக்குப் புதிய வாய்ப்புகள் தேடி வரும். கலைத்துறையினர் குறித்த வதந்திகள் மறையும். பெரிய நிறுவனங்களில் வாய்ப்பு கிடைக்கும்.

ராகு கேது பெயர்ச்சி பலன்கள் விருச்சிகம்

கேதுவின் பலன்கள்:

இதுவரை உங்களின் ராசியிலேயே அமர்ந்து உடல் சோர்வு, காரியத்தடைகள், மன உளைச்சல், விரக்தி மற்றும் சோம்பலைக் கொடுத்து வந்தார் கேது. இப்போது 12-ல் சென்று அமர்கிறார். உங்கள் பேச்சில் இனி தெளிவு பிறக்கும். உடல் ஆரோக்கியம் மேம்படும். அடிக்கடி கோபப்பட்டு வீண் வம்பில் சிக்கிக் கொண்டீர்களே... இனி சாந்தமாகப் பேசும் அளவிற்குப் பக்குவப்படுவீர்கள். சகல காரியங்களிலும் ஆர்வம் பிறக்கும். குடும்பத்தில் நல்லது நடக்கும்.

பிள்ளைகளின் கூடா பழக்கவழக்கங்கள் விலகும். மகனுக்குத் தடைப்பட்டிருந்த திருமணம் நல்லபடியே கூடிவரும். சகோதர - சகோதரி வகையில் அலைச்சல் இருந்தாலும் மகிழ்ச்சிக்குக் குறை இருக்காது. சொத்து சம்பந்தப்பட்ட பிரச்னைகள் தீரும். கோழித் தூக்கம் போட்ட நிலை மாறும்; நிம்மதியான தூக்கம் வாய்க்கும். உடலில் நீர் சேர்ந்து அவதிப்பட்ட நிலை மாறும்; எதிர்ப்பு சக்தி அதிகரிக்கும்.

கேதுபகவானின் நட்சத்திர சஞ்சாரம்:

21.03.2022 முதல் 24.09.2022 வரை: குருவின் விசாகம் நட்சத்திரத்தில் கேது செல்வதால் குழந்தையில்லாதவர்களுக்குப் பிள்ளை பாக்கியம் உண்டாகும். வீண் செலவுகள் அதிகரிக்கும். கண், காது வலிக்கும்.

25.09.2022 முதல் 04.06.2023 வரை: ராகுவின் சுவாதி நட்சத்திரத்தில் கேது செல்வதால் உங்களின் புகழ், செல்வாக்கு கூடும். எடுத்த வேலைகளை கொஞ்சம் போராடித்தான் முடிக்க வேண்டி வரும். மறைமுக எதிரிகளிடம் கொஞ்சம் கவனமாக இருங்கள்.

04.06.2023 முதல் 08.10.2023 வரை: செவ்வாயின் சித்திரை நட்சத்திரத்தில் கேது செல்வதால் சகோதர வகையில் மனஸ்தாபங்கள், அலைச்சல் வரக் கூடும். அவருடன் வீண் விவாதம் வேண்டாமே.

வியாபாரத்தில் பற்று-வரவு உயரும். வேலையாட்கள் உங்களிடம் விசுவாசமாக நடந்துகொள்வார்கள். பங்குதாரர்கள் உங்களின் ஆலோசனை களுக்கு ஒத்துழைப்பார்கள். உத்தியோகத்தில் எல்லோராலும் மதிக்கப் படுவீர்கள். அலுவலகப் பிரச்னைகள் நீங்கி நிம்மதி பிறக்கும். நீங்கள் விருப்பப்பட்ட இடத்திற்கே இடமாற்றம் உண்டு. வெகுநாட்களாக இழுபறியில் இருந்த சம்பள உயர்வும், பதவி உயர்வும் தேடி வரும்.

from Latest News https://ift.tt/QB1kjNx